Urkunde 1281 März 17: Unterschied zwischen den Versionen

Th(eodericus) comes de Limburg, Aleidis comitissa eius uxor legitima, Everhardus filius noster, Theodericus et Fredericus filii quondam Johannis de Limburcg nostri filii ac eius soror universis presencia visuris sincere dilectionis affectum. Cum ea, que fiunt pro tempore, labantur cum tempore, expedit, ut ea, que aguntur, in scripta publica redigantur. Hinc est, quod vestre universitati notum facimus per presentes, quod cum inter nos sive ex parte nostra ex una parte et reverendum patrem et dominum Ottonem abbatem et suum conventum Werdinensem ex altera super advocacia de Echolthe esset coram dicto abbate coram iudicio presidente in presentia fidelium et vasallorum monasterii diutius disceptatum pro eo videlicet, quod nos asseruimus, ipsam advocatiam ad nos ex successione hereditaria pertinere, tandem cum predictis.. abbate et conventu diversos hincinde tractatus habuimus de pace et concordia facienda. De consilio viri nobilis Everhardi comitis de Marka et Theoderici domini de Volmesteyne nostrorum consanguineorum, quos pro parte nostra elegimus ad huiusmodi discordiam sopiendam, necnon de consilio et conniventia omnium nostrorum heredum inter nos amicabiliter convenimus, quod receptis ab eisdem abbate et conventu XXV que marcis bonorum et legalium denariorum Coloniensis monete, quos recognoscimus et profitemur tenore presentium ex parte ipsorum integraliter recepisse in pecunia numerata renunciamus omni iuri, quod nobis competit aut de iure aut de facto sive nostris heredibus posset competere in futurum in advocatia de Echolte supradicta, et ipsam advocatiam cum suis pertinentiis universis resignamus in manus abbatis et conventus predictorum ipsorum utilitati sive usibus perpetuo retinendam, prout ipsis fuerit oportunum, relinquentes eisdem liberam facultatem de dicta advocatia ordinandi, disponendi, prout utilitati ipsorum monasterii viderint expedire, nichil iuris sive questionis nobis sive nostris heredibus in futurum de cetero reservantes in advocatia memorata, ab eorum impetitione, gravamine, perturbatione et molestatione penitus recedendo. Et nos heredes universi predictorum comitis et.. comitisse et heredes quondam viri nobilis Johannis de Limburg huic ordinationi pro nobis sive nostro nomine facte tenore presentium consensum benivolum impartimur, promittentes universi supradicti ipsis. . abbati et conventui bona fide, quod contra dictam ordinationem per nos aut per interpositam personam non veniemus nec aliquid attemptabimus in futurum, ipsam aliquatenus infringendo. Presentes erant, cum hec ordinatio facta fuerat.. vir nobilis .. Everhardus comes de Marka, Th(eodericus) dominus de Volmesteyne, Lubertus de Vitinchove, Henricus de Ekelo, Wenemarus de Dungelen. Everhardus de Lethene, milites: Mauritius de Hertgotinchusen etiam miles, Adolphus de Aldendorpe, Degenhardus de Letmette. Bertrammus de Speldorpe et Henricus de Didinchove laici et plures alii probi viri. In cuius rei testimonium nos Th(eodericus) comes de Limburg nostrum sigillum proprium, et nos.. comes de Marka et Th(eodericus) dominus de Volmesteyne nostra sigilla presentibus litteris duximus apponenda. Actum et datum apud Hatnegge, anno Domini MCC.LXXX., XVI° Kalendas Aprilis.