Urkunde 1364 Februar 28

Graf Engelbert von der Mark schließt am 28. Februar 1364 mit der Stadt Dortmund zu deren Schutz ein Bündnis auf Lebenszeit.

Wortlaut

Die Urkunde ist in mittelniederdeutscher Sprache verfasst und hat folgenden Wortlaut:

Wii Engelbrecht greve van der Marke doit kundich allen luden unde bekennet in diesen openen breyve, dat wii um gunst unde vrentschap hebt by raide unser vrende uns unde unse erven verbunden unde verbyndet mit der stad, mit dem raide unde mit den ghemeynen burgeren van Dortmunde also lange, alse wii greve Engelbreda vorscr. levet, unde lovet en in guden truwen. 1) Dat wii ere liif unde ere gud beschermen sulen unde welt, unde en truwelike helpen tyegen ab dey ghene, dey nu ere vyande sin unde binnen der tiit dat wii levet ere vyande werdet, op unsen schaden, eventure unde egene kost, uyt ghenomen in diesen verbunde unde vrentschap van unser wegene dem Romschen rike unde ersamen unde edelen heren hern Alve unsen brudere, ertsebyscope van Colne, heren Johanne byscope van Munstere, hern Engelbrechte byscope van Ludike, hern Wilhelme hertogen van Gulike, hern Wilhelme van dem Berghe, hern Johanne van Cleve, hern Goderde van Arnsbergh, hern Clawese van Tekeneborch, hern Diderike van Lymborgh den iungen greven, hern Bernde here van der Lyppe, Diderike van der Marke unsen broder, unde Symone van der Lippe unsen neven, unde uyt ghenomen van der van Dortmunde wegene dem Romschen rike, hern Alve ertsebysscope van Colne, hern Goderde greven van Arnsbergh unde den steden, alse Munstere. Osenbrucge unde Suyst. 2) Unde wii greve van der Marke vornompt verbyndet uns unde unse erven mit der stad, mit dem raide unde mit den ghemeinen burgeren van Dortmunde in wyse unde underschede, alse hir na ghescriven steit, dat dey van Dortmunde sulen eyme ytliken dun unde van eyme ytliken nemen van aller aensprake na vrentschap efte na rechte. Went we van dem raide unde van den burgeren van Dortmunde neyn recht nemen noch en neyn recht dun enwolde, des vyand sule wii und welt to hant wesen, mit al unsen amptluden, dey to der tiit sint it enwere sake, dat dey ghene dey dey van Dortmunde verunrechten wolde, er were ein efte meer, uns sunderlike vrentlich weren, den sule wii unde mogen unse vyantschap aighte daige to voren kundich dun. 3) Wert ock sake, dat tusschen den vornompden heren efte yenigen van den heren, dey wii in dieser vrentschap unde verbunde uyt ghenomen hebt, unde der stad, dem raide unde den burgeren van Dortmunde yenigerleye kunne, crich, uplop, tvist ef orloge opstonden binnen der tiit, dat wii levet, went wii der van Dortmunde mechtich sin to rechte, enwolden uns dan dey heren ef dey here des nycht horen, so ensule wii unde alle dey under uns in unserne lande gheseten sin, der heren sy eyn ef meer, nycht behelplich noch vorderlich wesen sunder arghelist, men wii unde dey unse sulen unde welt der stad , dem raide unde den ghemeynen burgeren van Dortmunde ghehengigh wesen sunder arghelist. 4) Vortmer, vellet, dat welich meynsche in unseme lande hedde yenigerleye sake wider yenigen burgere van Dortmunde, dey ensal noch liif noch gud anderer burgere van Dortmunde hyndern noch besetten, men allene des meynschen liif unde gud, dar dey sake tvegen gheit, unde van deme sal dey clegere nemen ein unvertoget recht. 5) Vart so welle wii unde lovet in diesen breyve stede unde vast to haldene, dat dey raid unde dey ghemeynen burgere van Dortmunde mogen mit eren gude unde mit eren ghesinne seker unde vry in unseme gheleyde, in unse land, stede unde veste komen, dar inne wesen unde dorch unse land unde herschap varen unde teyn unde widerkomen ane yenigerhande hynder, it enwere, dat wey breke, dat dey beterde na rechte ef na ghenade. 6) Vart welle wii. dat so wanner unde vu dicke dey burgere van Dortmunde ef er helpere eyne volgynge dun wellet up ere vyande, dat dey burgere unde ere helpere mogen also dicke seker teyn dorch unse land unde unse gherichte. Worden ock unse amptlude, dey to der tiit weren, unde unse undersaten dar umme gheeyschet van den burgeren van Dortmunde ef van eren helperen, so sulen sey mit ers selves lyven unde mit clockenslage mit unseme gantzen lande der van Dortmunde und eire helpere liif unde gud beschermen unde en truwelike helpen. 7) Vart worde der vornompden burgere van Dortmunde eyn ef meer ghevangen efte ere gud ghenomen, dat sulen unse amptlude, dey to der tiit sin unde unse untersaten mit unsen gantzen lande keren na al erre macht. 8) Ock ensal neyn van unsen undersaten der van Dortmunde vyande husen noch hoven. 9) Ock so verbynde wii uns unde lovet, dat so wanner unde wu dicke dey van Dortmunde reysen welt, dat dan so welk van unsen amptmannen gheeyschet wert van en, dat dey sal mit synes selves lyve mit also vele wapenden luden, alse hey hebben kan, ef mit unseme gantzen lande eyne navolgynge dun up ere vyande. Up dat alle diese vorscrevenen stucke deste beth bewart unde ghehalden werden, so welle wii, dat al unse amptlude, dey to der tiit sin, komen to Dortmunde in dey stad unde sulen loven in guden truwen, stede unde vast to haldene dem raide unde den burgeren van Dortmunde al diese vornompden puncte unde stucke na al erre macht, unde dat alle diese vornompden stucke deste vastere ghehalden werden, so hebbe wii van unser weghene ghesat unse leyven vrende Hermanne van Pentlyneg, ritter, unsen amptman to Unna unde Diderike van Wermynchusen unsen droesten to Wettere, wilke tve sulen mit tven burgermesteren, dey to der tiit to Dortmunde sin, vulle macht hebben to likene, to verslichtene unde to endene na rechte ef in vrentschap binnen der stad van Dortmunde alle dynch, dey to rechtverdigen sin van allen saken dey vornompt sin, unde wert, dat der tviger unser vrende vorgenant ein ef sey beyde, ef dey in er stiitde ghesat werdet, aifgengen, wo dicke dat ghesche, alse dicke sule wii, binnen nesten veyrtinnaichten dar na einen andern ef tve also gude an er stiitde widersetten sunder widersprake. Al arghelist uyt ghesait in alle diesen dyngen. To eime tuge der warheit unde vestynge alle dieser vorghenompden stucke hebbe wii Engelbrecht, greve van der Marke vorgenant, vor uns und vor unse erven unse grote seghel dun hangen an diesen breyf. Datum anno domini 1364 feria 4 proxima post festum beati Mathie apostoli.

Siehe auch

• Portal:Urkunden