Urkunde 1232 März 10: Unterschied zwischen den Versionen

In nomine sancte et individue trinitatis. Heinricus miseratione divina sancte Coloniensis ecclesie archiepiscopus universis Christi fidelibus presentium inspectoribus salutem in vero salutari. Ne ea que fiunt in tempore memoriam penitus effugiant humanam scripti solent munimine et subscriptione testium roborari, unde vestre notum facimus discretioni, quod cum nobiles viri Adolphus et Ludolphus comites de Daslen et eorum legitimi heredes predium suum videlicet curtem de Linne cum capella et cum omnibus suis attinentiis, exceptis tantum ministerialibus et hominibus suis militibus et homagio eis astrictis, ecclesie sancte Katerine in Tremonia in meram vendidissent proprietatem, nos ex publica fama intelligentes, id predium ad ecclesiam nostram ratione proprietatis de iure spectare debere, et quod iidem comites idem predium in feodo nomine ecclesie possident, nos eosdem comites super venditionem illius predii iudicialiter convenimus, contractum illum rescindere proponentes, unde cum iidem comites per nobiles virosomni exceptione maiores coram nobis legitime probassent, predictum predium ad eorum spectare proprietatem, ita quod ecclesia nostra nichil iuris in eo haberet, nos ab actione illa penitus recessimus, contractum eiusdem venditionis sicut legitime celebratus fuerat ratum per omnia habentes. Ne autem sepefati comites aut eorum successores et ecclesia beate Katerine memorata super eodem contractu iterato valeant in posterum inquietari, presens scriptum sigilli nostri appensione et testium subscriptione fecimus corroborari. Sunt autem hii testes Heinricus sancti Severini, Theodericus de Monasterio in Eifle, Theodericus in Scheide, Hermannus sancte Walburgis, preposito, Pilegrimus notarius noster, Godefridus comes de Arnesberch et Godefridus filius suus, Adolphus comes de Marchia et Everhardus filius suus, Adolphus comes de Waldigge, Bernardus nobilis vir de Lippia, Hermannus frater noster de Mulenarke, Hermannus de Rudenberch, Jonatas de Ardey, nobiles, Conradus comes Tremoniensis, Albertus de Hurde, Gotzvinus villicus Susatiensis, Riquinus Maresclacus, Mauritius de Ahusen et Godefridus frater suus, Everhardus de Bruke, Lutbertus Herbordus Bertoldus Ludewicus fratres de Suanbule, ministeriales ecclesie nostre, Rutgerus de Burcbenne, Albertuis dapifer, Petrus de Wickede, Franco de Brakele et alii quam plures. Actum publice in Susato, anno incarnationis dominice 1232, 6. idus Marcii.

Adolphus, Graf von der Mark (Marchia) und Everhardus, sein Sohn